Бариста - кофе әзірлеуші, кофе дайындау жөніндегі маман, дәндерден табиғи кофе де, оның негізіндегі сусындарды да дайындайды. Итальян тілінен аударғанда «бариста» сөзі «бармен» дегенді білдіреді. Шынында да, бастапқыда бариста деп бармендер мен кофе-машина операторларының міндеттерін біріктіретін адамдарды атады. Бірақ кофенің танымал болуына байланысты біртіндеп эспрессо және оның туындыларын (латте, капучино және басқа кофе сусындары) дайындауға мамандандырылған бариста пайда болды. Бариста кофе туралы бәрін білуі керек: әр түрлі сорттардың кофе дәндері бір-бірінен несімен ерекшеленеді, олар қандай жағдайда өседі, оны қандай әдістермен жинайды, өңдейді, қуырады; және оларды қуыру тәсілдерін, кофенің әр алуан түрі қандай дәм мен хош иіс береді; сондай-ақ дәнді және ұнтақталған кофені сақтау шарттарын білу тиіс. Мысалы, ылғалды ауада кофе дәндері дәмін өзгертеді.